Trump: Është tepër vonë – paralajmëron vazhdim të sulmeve ndaj Iranit

Presidenti amerikan thotë se udhëheqja iraniane “ka ikur” dhe se operacionet ushtarake mund të zgjasin edhe disa javë.

Presidenti i Shteteve të Bashkuara, Donald Trump, ka reaguar me një mesazh të shkurtër në rrjetin social Truth Social lidhur me zhvillimet e fundit të luftës në Iran, përcjell albinfo.ch.

Duke iu përgjigjur një përdoruesi që pretendoi se sulmet amerikane kanë sjellë “lindjen e Doktrinës Trump”, ai shkroi se mbrojtja ajrore, forcat ajrore, marina dhe lidershipi i Iranit “kanë ikur” dhe se pala iraniane “dëshiron të flasë”. “Unë thashë: ‘Tepër vonë!’”, citohet të ketë shkruar Trump.

Presidenti amerikan ishte gjithashtu i pari që njoftoi për vrasjen e udhëheqësit suprem iranian, Ali Khamenei, në sulmet e së shtunës — disa orë përpara se media shtetërore iraniane ta konfirmonte lajmin.

Duke folur nga White House, Trump deklaroi se operacionet ushtarake mund të zgjasin edhe katër deri në pesë javë. Nga ana tjetër, sekretari amerikan i Shtetit, Marco Rubio, paralajmëroi se “goditjet më të rënda ende nuk kanë ardhur”.

Tensionet në rajon vazhdojnë të rriten, ndërsa pritet të shihet nëse do të ketë përshkallëzim të mëtejshëm apo hapësirë për negociata.

---