Tryezë e rrumbullakët në Gjenevë: “E vërteta, drejtësia dhe kujtesa për personat e zhdukur”

E diel, 31 gusht 2025 – ora 15:00. Maison des Arts du Grütli – Gjenevë, me rastin e Ditës Ndërkombëtare të Viktimave të Zhdukjeve me Dhunë

Në kaudrin e aktiviteteve që organizohen në kuadrin e shënimit të Ditës Ndërkombëtare të Viktimave të Zhdukjeve me Dhunë, Shoqata Kulturore Dora d’Istria dhe Lidhja Shqiptare në Botë organizojnë një tryezë të rrumbullakët me titull: «E vërteta, drejtësia dhe kujtesa për personat e zhdukur».

“Çdo zhdukje me dhunë lë pas vetes një mungesë të padurueshme: familje pa përgjigje, gjenerata të tëra të prekura nga pasiguria dhe zija e pambaruar. Njëzet e pesë vjet pas luftës në Kosovë, mbi 1 600 persona ende konsiderohen të zhdukur. Kjo dramë prek gjithashtu edhe rajone të tjera të botës, nga Ukraina në Amerikën Latine, dhe mbetet një realitet universal.

Në këtë takim përkujtimor do të marrin pjesë dëshmitarë, familjarë të të zhdukurve, artistë dhe ekspertë të të drejtave të njeriut nga fusha e sociologjisë dhe ajo juridike, për të eksploruar tre dimensione thelbësore: të drejtën për të vërtetën, kërkimin e drejtësisë dhe domosdoshmërinë e ruajtjes së kujtesës kolektive”, thuhet në një komunikatë të organizatorëve, shkruan albinfo.ch.

Veçanërisht domethënëse është pjesëmarrja e familjarëve nga Kosova dhe nga Argjentina. Gershetimi i këtyre dy përvojave,  njëra e afërt në kohë dhe tjetra e largët historikisht  dëshmon se dhimbja e zhdukjes me dhunë nuk njeh kufij e as kohë. Përkundrazi, ajo arrin t’i afrojë njerëzit sot, në një solidaritet të ri që tejkalon distancat dhe historitë kombëtare.

Përtej dëshmisë, synimi është të hapet një hapësirë dialogu qytetar dhe reflektimi mbi aftësinë e institucioneve dhe shoqërisë civile për t’iu përgjigjur kësaj tragjedie njerëzore.

Diskutimi synon të jetë një akt kujtese dhe angazhimi, për të rikujtuar se harresa nuk është një opsion dhe se dinjiteti i familjeve kërkon të vërtetën dhe njohjen.

Ky aktivitet është pjesë e manifestimit dyditor në Gjenevë, që fillon me Marshin për Drejtësi, të shtunën më 30 gusht, dhe vazhdon me hapjen e ekspozitës kolektive, të dielën më 31 gusht në ora 14:00, në hapësirën Hornung të Maison des Arts du Grütli në Gjenevë.

---