Turqia ndan rreth një milion dollarë donacion për FSK-në

Turqia ka ndarë rreth 1 milion dollarë donacion për ngritjen e kapaciteteve ushtarake të FSK-së.

Lajmin e ka bërë të ditur ministri i Mbrojtjes, Ejup Maqedonci, përmes një njoftimi në Facebook, ku thotë se ky donacion është pjesë e programit të mbështetjes së jashtme ushtarake të qeverisë turke.

“Dje zyrtarisht kemi pranuar vendimin e Qeverisë së Republikës së Turqisë, e cila ka ndarë për Ministrinë e Mbrojtjes së Republikës së Kosovës 31 milionë lira, apo rreth 1 milion dollarë amerikanë donacion për ngritjen e kapaciteteve ushtarake të FSK-së. Ky donacion është pjesë e programit të mbështetjes të jashtme ushtarake të qeverisë turke.

Marrëdhëniet mes dy vendeve tona kanë qenë gjithnjë në nivelet më të larta dhe kontributi i Republikës së Turqisë në ngritjen e kapaciteteve të Forcës së Sigurisë së Kosovës ka qenë i vazhdueshëm si në aspektin e trajnimeve, ashtu edhe në atë të pajisjeve ushtarake. Falendëroj Republikën e Turqisë për donacionin dhe siguroj që bashkëpunimi ynë i ndërtuar në frymën e besimit të dyanshëm do të vazhdojë edhe në vitet në vijim. Turqia si shtet mik mbetet njëri nga partnerët strategjikë më të rëndësishëm për Republikën e Kosovës”, shkruan ministri.