UEFA eviton përballjen mes Kosovës dhe Serbisë

Në shortin për kualifikueset e Kampionatit Evropian të U19 shorti vëri përballë Kosovën dhe Serbinë, megjithatë, UEFA evitoi këtë duel, pasi këto dy Përfaqësuese nuk mund të luajnë kundër njëra-tjetrës

Përfaqësueset e grupmoshave U-17 dhe U-19 të Kosovës kanë mësuar rivalët në rrethin e parë kualifikues të Kampionateve Evropiane përkatëse të vitit 2018, ku do të bëjnë dhe debutimin e tyre ndërkombëtar pas pranimit në UEFA dhe FIFA, shkruan albinfo.ch.

Kosova U-17 është vendosur në Grupin 9 kualifikues të Kampionatit Evropian U-17 “Angli 2018”. Kundërshtarët e Kosovës do të jenë Holanda, Uellsi dhe Hungaria. Ndeshjet e grupit luhen me sistem grumbullimi dhe do të zhvillohen në Hungari gjatë datave 10-16 tetor 2017.

Kosova U-19 është vendosur në Grupin 6 kualifikues të Kampionatit Evropian U-19 “Finlandë 2018”. Kundërshtarët e Kosovës do të jenë Austria, Izraeli dhe Lituania. Si fillim shorti vendosi Kosovën dhe Serbinë në të njëjtin grup, por më pas gjithçka u ndryshua duke qenë se me vendim të UEFA-s këto dy ekipe nuk mund të ndeshen së bashku. Ndeshjet e grupit luhen me sistem grumbullimi dhe do të zhvillohen në Austri gjatë datave 3-9 tetor 2017.