Varfëria në Kosovë është një nga sfidat serioze

Kështu u tha në tryezën me temë "Nismat konkrete për politikëbërje në sferën e përfshirjes sociale"

Kosova vazhdon të përballet me një numër të lartë të papunësisë dhe këtij numri i shohen çdo vit 30 mijë të rinj që kërkojnë punë. Gjithashtu vazhdon të ketë përqindje të lartë të varfërisë.

Të gjitha këto vështirësi sociale janë përmendur nga kryetari i Kuvendit të Kosovës, Jakup Krasniqi në tryezën me temë “Nismat konkrete për politikëbërje në sferën e përfshirjes sociale”, në të cilën u prezantua raporti i Agjencisë Zhvillimore të Organizatës së Kombeve të Bashkuara për Kosovë.

Krasniqi ka thënë se sikur në gjithë botën edhe në Kosovë, po shënohet java kundër varfërisë. Por sipas tij, kjo dukuri vazhdon të jetë nga nja sfidat më serioz për shoqërinë tonë.

Raporti i prezantuar nga Agjencia Zhvillimore e Organizatës së Kombeve të Bashkuara jep një pasqyrë të përfshirjes sociale në Kosovë, duke përshkruar gjendjen e njerëzve më të rrezikuar.

Të dhënat janë nxjerrë nga institucionet e Kosovës, agjencitë e OKB-ve për zhvillim, si dhe nga forumet këshilluese dhe akademike.