Qytetarët serbë mirëpresin implementimin e marrëveshjes për targat

Ka nisur sot zbatimi i pikës së dytë të Marrëveshjes së Brukselit, sipas së cilës, si Kosova, ashtu edhe Serbia do të mbulojnë elementet shtetërore të targave të njëra-tjetrës deri në gjetjen e një zgjidhjeje të përhershme. E vendosja e etiketave ngjitëse në targa po mirëpritet nga qytetarët serbë që ia kanë mësyrë Kosovës përmes pikës kufitare në Merdar.

Zëvendësimi i tabelave të përkohshme, sipas marrëveshjes për targat të arritur në Bruksel, me vendosjen e etiketave ngjitëse mbi elementet shtetërore nuk zgjat më shumë se një minutë, procedurë kjo që ka përshpejtuar procedurat për kalimet kufitare Kosovë – Serbi.

Ndonëse ka qarkullim më të vogël se më 20 shtator, kur edhe u mor vendimi nga Qeveria e Kosovës për reciprocitet për targat e automjeteve të Serbisë, qytetarët që kaluan kufirin në Merdar në përgjithësi po mirëpresin marrëveshjen e arritur në Bruksel, duke thënë se u takon të zbatojnë marrëveshjet që arrihen mes dy qeverive. Teksa shprehen të kënaqur që me marrëveshjen e Brukselit u është lehtësuar procedura për kalimin e kufirit me Kosovën.

Qytetari Dejan Paunoviq, që po udhëtonte për në Mitrovicë dhe në Vushtrri, thotë se procedura e re nuk po u merr shumë kohë. Teksa shton se këtë herë nuk pati vonesa të asnjë natyre.

Paunoviq: Ne duhet të zbatojmë atë që pajtohen të mëdhenjtë

“Është vetëm një procedurë, kështu që ne duhet ta zbatojmë atë që pajtohen ata të mëdhenjtë. 

Sa zgjat e tërë procedura? -Jo shumë, gjysmë ore.

A ka pasur vonesa këtë herë?  – Jo, jo, thotë ai.

Edhe qytetari serb Milosh Milovanoviq thotë se procedura e re është shumë e lehtë se ajo paraprakja, kur është dashur të pajisen me targat e përkohshme.

Milanoviq: Etiketa e vogël është për mbulimin e emrit të shtetit, i gjati vendoset mbi stemë

“Procedura është shumë e lehtë, pas verifikimit të dokumentacionit, polici ka dhënë etiketat ngjitëse me udhëzime. Etiketa e vogël është për mbulimin e emrit të shtetit, kurse ky i gjati vendoset mbi stemë. Vendosja zgjat një minutë, mendoj se kjo është zgjidhje e mirë, më e mirë se ajo me targa të përkohshme”, thotë ai.

Implementimi i kësaj pike po zbatohet në përpikëri në Merdar, ku të gjithë shoferët që po hyjnë në Kosovë dhe ata që po dalin jashtë saj e që kanë targat e veturave RKS apo SRB po mbulojnë simbolet shtetërore.

Ndërkaq, më 21 tetor pritet të nisë punën një ekip i përbërë nga zyrtarë të BE-së, Kosovës dhe Serbisë, për të gjetur një zgjidhje të përhershme në formatin e dialogut të lartë. Grupi brenda 6 muajve duhet të prezantojë gjetjet për një zgjidhje të tillë.