Vitin e kaluar, 45 mijë veta lëshuan Kosovën

Gjatë vitit 2014, 45 333 banorë janë larguar nga Kosova, ndërsa 5 720 kosovarë janë kthyer. Bilanci i migrimit për vitin 2014 ishte -39 613 persona, raporton ASK

Më shumë se 45 mijë qytetarë e kanë lëshuar Kosovën gjatë vitit të kaluar duke imigruar jashtë vendit. Kështu raporton Agjencia e Statistikave të Kosovës (ASK) e cila të premten publikoi raportin mbi “vlerësimin e popullsisë 2014”. Sipas këtyre statistikave, në vitin 2014 ka më pak kosovarë se sa në vitin 2013.

:Përkundër një shtimi natyror prej 23 922 banorëve, popullsia rezidente e Kosovës u zvogëlua për 15 687 banorë, për shkak të emigrimit (largimit) të theksuar në vitin 2014.

Popullsia rezidente e Kosovës për vitin 2014 (31 dhjetor) vlerësohet të jetë 1 804 944 banorë, krahasuar me vlerësimin e vitit 2013, që ishte 1 820 631 banorë”, thuhet në raport.

Publikimi, sipas ASK-së, ofron të dhëna statistikore mbi popullsinë (demografinë) në nivel vendi dhe komune. Baza e të dhënave është marrë nga numri i vlerësuar i popullsisë rezidente në Kosovë në fund të vitit 2013, lindshmëria, vdekshmëria dhe lëvizjet e popullsisë së Kosovës për periudhën 01 janar – 31 dhjetor 2014.

Shtimi natyror i popullsisë në Kosovë gjatë vitit 2014, sipas kësaj agjencie, ishte 23 922 banorë. Numri i lindjeve me banim rezident në Kosovë për vitin 2014 ishte 32 087 lindje, kurse numri i vdekjeve ishte 8 165.

“Gjatë vitit 2014, 45 333 banorë janë larguar nga Kosova (numri i emigrantëve kosovarë), derisa numri i personave që kanë imigruar (ardhur) në Kosovë ishte 5 720 banorë. Bilanci i migrimit për vitin 2014 ishte -39 613 persona”, thuhet në statistikat e ASK-së.

Ndryshe, në këtë publikim, janë përfshirë edhe lëvizjet e brendshme të popullsisë (nga një komunë në tjetrën), ku numri i përgjithshëm është  9 466 banorë.