Vjedhje brenda policisë, suspendohet komandanti

Mbi 30 kilogramë ari janë vjedhur brenda stacionit të policisë. Suspendohet komandanti Ahmet Hasi

Një vjedhje tjetër spektakolare ka ndodhur brenda Policisë së Kosovës. 25.3 kilogram ari janë zhdukur nga Dhoma e Dëshmive në Stacionin e Policisë në Pejë, ndërsa menjëherë pas konfirmimit të këtij rasti, ka reaguar Komanda e Policisë në Prishtinë duke shkarkuar komandantin e policisë në Pejë dhe duke arrestuar katër eprorë të tjerë

Bëhet e ditur se nga detyra është shkarkuar Ahmet Hasi, komandanti i Policisë rajonale në Pejë, ndërsa në vend të tij, është emëruar Shaban Shala. Në arrest, ndërkaq është edhe shefi i hetimeve rajonale, Bajram Koliqi.

Përveç reagimit të menjëhershëm të komandantit të policisë, Shpend Maxhuni, Policia e Kosovës akoma nuk ka dhënë ndonjë reagim zyrtarë lidhur me këtë rast. Ky është rasti i dytë i vjedhjeve brenda Policisë së Kosovës pas atij të vitit 2009, kur nga Dhoma e Dëshmive në Prishtinë u vodhën mbi 47 kilogram heroinë, rreth 3 milionë euro dhe dëshmi të tjera të rëndësishme për hetime.

Kjo vjedhje e cila kishte ndodhur ndërmjet 24 dhe 25 prillit të vitit 2009, asnjëherë nuk u ndriçua. Rasti herë e morën në dorë policia e Kosovës e herë ajo e EULEX-it, megjithatë asnjë gjurmë nuk është zbuluar. Policët që u suspenduan atëbotë u rikthyen sërish në punë, ndërsa rasti u “tret si kripa në ujë”.