Votohet raporti për verifikimin e mandateve

Me 120 vota për, Kuvendi i Kosovës ka miratuar raportin për verifikimin e mandateve të deputetëve gjatë seancës së tretë konstituive, përcjell albinfo.ch.

Ky dakordim erdhi pas një takimi ndërpartiak të zhvilluar sot në orën 11:30, ku krerët e partive politike arritën një marrëveshje të përbashkët.

Ministrja Albulena Haxhiu deklaroi se gjatë këtij takimi është arritur pajtim unanim për krijimin e një Komisioni të ri, i cili do të kishte mandat të shqyrtojë edhe një herë raportin e marrë nga Komisioni Qendror i Zgjedhjeve (KQZ) dhe ta procedojë atë për miratim në Kuvend.

“Sot, në seancë kemi theksuar që Komisioni i ri, me autorizim të Kuvendit, të mblidhet edhe një herë për të shqyrtuar raportin nga KQZ-ja dhe për ta sjellë për votim. Është arritur pajtimi që raporti të votohet unanimisht nga të gjitha partitë politike,” tha Haxhiu.

Ky hap shënon një moment të rëndësishëm drejt konstituimit të plotë të legjislaturës së re të Kuvendit të Kosovës.