Vrasje e trefishtë në Gjakovë, me motiv gjakmarrjeje

Viktimat janë: V. I, i moshës 35 vjeçare, A. I, i moshës 28 vjeçare si dhe Z. K i moshës 37 vjeçare. Kryeprokurori Selimaj ka thënë se dyshohet se motivi i vrasjes është hakmarrja

Si pasojë e një përleshjeje me armë janë vrarë sot në Gjakovë tre persona. Ngjarja ka ndodhur  rreth orës 16:00, në rrugën “Ismail Qemajli”, (qarshia e vjetër) në Gjakovë.

Lajmin e ka konfirmuar edhe zëdhënësja e Policisë së Kosovës për rajonin e Gjakovës,  Lirie Podrimaj, shkruan kosovapress.com. “Në orën 16:00 ka ndodhur një vrasje, ku tre persona kanë humbur jetën, në rrugën “Ismail Qemali” në Gjakovë. Patrullat policore i janë përgjigjur menjëherë informatës dhe janë në kërkim të të dyshimtit”, ka thënë Podrimaj.

Ajo ka shtuar se viktimat janë të gjinisë mashkullore, të moshës 25-35 vjeçare.

Ndërkohë policia njofton se ngjarja ka ndodhur në njërën prej  kafiterive të qytetit të Gjakovës.

Njëra nga viktimat ishte në vendin e ngjarjes ndërsa dy viktimat tjera janë dërguar në emergjencën e spitalit rajonal ,,Isa Grezda “ në Gjakovë ku mjeku kishte konstatuar vdekjen e tyre.

Viktimat janë: V. I, i moshës 35 vjeçare, A. I,  i moshës 28 vjeçare si dhe Z. K i moshës 37 vjeçare.

Në vendin e ngjarjes kanë dalë të gjitha njësitet relevante të policisë së Kosovës dhe kryeprokurori i Prokurorisë Themelore në Gjakovë.

Policia thotë se deri më tani nuk ka të arrestuar, dhe se patrullat policore janë vënë në kërkim të personave të dyshuar të mundshëm.

Autori i vrasjes së trefishtë që ka ndodhur sot pasdite në Gjakovë dyshohet të jetë Gjelbrim Gj.

Këtë informacion e ka dhënë për KALLXO.com ushtruesi i detyrës së kryeprokurorit të Prokurorisë në Gjakovë, Ali Selimaj.

Sipas tij, Policia ka shkuar për ta arrestuar të dyshuarin.

Selimaj ka thënë se dyshohet se motivi i vrasjes është hakmarrja.