Vrau studenten, ndërron jetë në spital Aldison Belulaj

Ai kishte vrarë 21-vjeçaren Arjela Murataj para një jave, derisa qëlloi edhe veten, në tentim për vetëvrasje

Ka ndërruar jetë në Spitalin e Tiranës, Aldison Belulaj, i cili qëlloi me armë zjarri mesditën e të dielës së kaluar 21-vjeçaren Arjela Murataj para portës së Fakultetit të Mjekësisë, raportojnë mediat shqiptare.

Pasi qëlloi studenten e juridikut, Aldison Belulaj qëlloi edhe veten në një tentativë për t’u vrarë, por pas një jave në reanimacionin e Spitalit të Traumës, ku ndodhej në gjendje kome, 23-vjeçari nuk i ka mbijetuar plagës së marrë dhe ka ndërruar jetë, përcjell albinfo.ch.

Ngjarja e një jave më parë, u cilësua si një krim pasioni, ku shkak mbeti refuzimi i vajzës për të pasur një lidhje me djalin.

Për këtë vrasje kishte edhe protesta, duke kërkuar më shumë mbrojtje ndaj grave, derisa ky fenomen po rritet në Shqipëri.