Vuçiq, pas takimit me Merkel: Duhet gjetur kompromis me Kosovën

(KEYSTONE/Laurent Gillieron)

Presidenti serb, Aleksandar Vuçiq, është takuar sot në Davos, Zvicër, gjatë Forumit Ekonomik Botëror, me kancelaren gjermane, Angela Merkel. Ai pas takimit është shprehur se duhet të gjendet një kompromis për Kosovën.

“Kompromisi është diçka që çon në rezultate të mira dhe se njerëzit duhet të përpiqen të bëjnë kompromis, të mos i poshtërojnë dhe të shkatërrojnë kundërshtarët e tyre”, është shprehur Vuçiq.

“Ne do ta kuptojmë këtë në Serbi”, tha Vuçiq, duke shtuar se biseda me Angela Merkel nuk ishte e thjeshtë dhe se ata kaluan shumicën e kohës duke biseduar rreth Kosovës dhe integrimit evropian të Serbisë.

“Ne biseduam më shumë për Kosovë, integrimin evropian të Serbisë… Biseda nuk ishte e thjeshtë, vetëm se kemi një vështrim se si ta zgjidhim këtë problem në Serbi. Vendet që e kanë njohur Kosovën kanë një qëndrim paksa të ndryshëm. Merkel, mendoj, vlerëson dhe respekton dëshirën tonë për të folur dhe për të arritur një kompromis”, tha Vuçiq.

Ai shtoi se takim me Merkel ishte i rëndësishëm dhe se kishin rënë dakord të informonte kancelarën më shpesh rreth çështjeve të rëndësishme.

“Unë gjithashtu kam marrë një thirrje për ta vizituar Berlinin përsëri dhe sot kam mësuar shumë nga zonja Merkel”, tha Vuçiq, shkruan Lajm, përcjell albinfo.ch.