Xhaka sqaron gjestin pas golit fantastik ndaj Hull Cityt

Granit Xhaka ka thënë se ishte diçka spontane dhe jo e planifikuar. Ai shënoi gol të bukur ndaj Hull Cityt, por festa e golit u komentua në mënyra të ndryshme

Mesfushori shqiptar, Granit Xhaka e ka shpjeguar mënyrën e festimit të golit të tij kundër Hull Cityt në muajin e kaluar. Në festën e tij, 24-vjeçari e vendosi gishtin tregues te buzët dhe hunda sikur t’i thoshte dikujt që të heshtë, ndërsa dorën tjetër e ngriti lart, shkruan albinfo.ch.

Për këtë kishte shumë spekulime, por i ka sqaruar për ‘Blick.ch’. “Ishte spontane dhe nuk e kisha planifikuar. Mendoj se e kam ëndërruar një natë para ndeshjes. Ishte si një ‘deja vu’, prandaj e bëra”.

“E kisha parë në ëndërr këtë mënyrë të festimit. Ndërsa edhe emocionet ishin shumë të mëdha”, ka sqaruar Xhaka.