Zaev shpall fitoren: Sot fitoi e ardhmja

Zoran Zaev i vlerësoi zgjedhjet si evropiane, të sigurta dhe bashkëkohore

Kreu i LSDM-së, Zoran Zaev shpalli fitore të LSDM-së dhe koalicionit “Mundemi” në zgjedhjet e parakohshme parlamentare në Maqedoninë e Veriut.

“Me një avantazh bindës dhe të qëndrueshëm me mbi tre mandate para VMRO-DPMNE-së, me mundësi për një ose dy mandate më tepër, koalicioni ‘Mundemi’ është fitues në këto zgjedhje parlamentare”, tha mes tjerash Zaev, përcjell albinfo.ch.

Zaev i vlerësoi zgjedhjet si evropiane, të sigurta dhe bashkëkohore si dhe falënderoi të gjithë ata që dolën për të votuar.

“Sot fitoi e ardhmja, fitoi përparimi. Koncepti ‘një shoqëri për të gjithë’ i mundi përçarjet”, tha Zaev.

Në Maqedoninë e Veriut nga 93.96% e votave të numëruara fitues është koalicioni “Mundemi” i udhëhequr nga LSDM-ja.

Sipas mediave maqedonase koalicioni “Mundemi” i udhëhequr nga LSDM-ja ka marrë deri tani 36.13% të votave, ndërsa VMRO-DPMNE ka marrë 34.65%.

Nga partitë shqiptare BDI e Ali Ahmetit ka siguruar deri tani 11.57% dhe koalicioni ASH- Alternativa ka siguruar 8.79% të votave. Partia e Majta ka marrëv 3,96%, PDSH 1.48% dhe Integra 1.33%.

---