Zgjedhjet Federale, qytetarët gjermanë do të votojnë nesër

Gjermani - unsplash - photo by Florian Wehde

Mësohet se qytetarët gjermanë do të votojnë nesër në zgjedhjet federale, të cilat vlerësohen shumë të rëndësishme jo vetëm për Gjermaninë, por edhe për mbarë Evropën, përcjell albinfo.ch

Favoriti për t’u bërë kancelari i ardhshëm gjerman është Friedrich Merz, lideri i partisë së qendrës së djathtë, Unioni Kristian Demokrat.

Sondazhet e fundit tregojnë se koalicioni CDU/CSU gëzon një epërsi me rreth 30% mbështetje. Në vendin e dytë është partia ekstremiste e djathtë AfD, pastaj vijnë SPD, Të gjelbërit dhe e Majta. Sipas sondazheve, Liberalët (FDP) dhe Lëvizja e Sahra Wagenknecht nuk janë të sigurta se do të futen në Bundestag.

Rritja e partisë së ekstremit të djathtë, Alternativa për Gjermaninë (AFD) ka tërhequr vëmendjen e shumë analistëve para këtyre zgjedhjeve. AfD është rritur në popullaritet dhe aktualisht po renditet e dyta dhe pritet të marrë rreth 21% të votave.

Siç vlerësohet, është gati e sigurt se asnjë parti nuk do të fitojë aq vota për të krijuar shumicën në parlament, kështu që do të ketë nevojë të krijohet një koalicion qeverisës mes partive.

Është e rëndësishme se të gjitha partitë kryesore gjermane, përfshirë CDU-në e Merz-it, kanë përjashtuar kategorikisht formimin e një koalicioni me AfD-në. Ky përjashtim do të thotë se është praktikisht e sigurt që AfD nuk do të jetë pjesë e qeverisë së ardhshme.