Zgjerohen protestat në Serbi, Vuçiqi kërcënon me masa të ashpra

Pas një vale protestash antiqeveritare, presidenti serb Aleksandar Vuçiq paralajmëroi masa të ashpra ndaj demonstruesve, të cilët i quajti “terroristë”. Ai deklaroi se qeveria do të përdorë çdo mjet për të rivendosur ligjin dhe rendin, duke shtuar se po përgatitet një kornizë ligjore dhe formale për këtë qëllim. Megjithatë, Vuçiqi nuk ka marrë në konsideratë shpalljen e gjendjes së jashtëzakonshme.

Në Beograd dhe qytete të tjera, protestat u shoqëruan me përleshje midis policisë dhe demonstruesve. Fillimisht, tubimet nisën pas shembjes së një stacioni hekurudhor në Novi Sad në nëntor 2024, ku humbën jetën 16 persona, por më pas u zgjeruan kundër qeverisë dhe korrupsionit të përhapur.

Autoritetet raportuan një polic të plagosur dhe 18 demonstrues të arrestuar gjatë natës së fundit të protestave, ndërsa numri i të plagosurve mbetet i pasqaruar. Mediat e pavarura në Serbi theksojnë se dhuna shpesh është nxitur nga mbështetës të qeverisë, ndërsa autoritetet nuk kanë ndërhyrë mjaftueshëm.

Komisioneri i Këshillit të Evropës për të Drejtat e Njeriut, Michael O’Flaherty, shprehu shqetësim për përdorimin e “joproporcionuar të forcës nga policia” dhe bëri thirrje për ndalimin e arrestimeve arbitrare dhe qetësimin e situatës.