Zjarret në disa automjete shkaktojnë mbylljen e autostradës A1

(KEYSTONE/Gaetan Bally)

Autostrada A1 është mbyllur plotësisht në të dy drejtimet mes Neuenhof dhe Wettingen që nga mbrëmja e së premtes, pas disa zjarreve që përfshinë pesë automjete në një segment të mbuluar të rrugës, shkruan 20minuten, transmeton albinfo.ch.

Sipas Policisë së Kantonit të Aargau, incidenti ndodhi rreth orës 20:00, kur një automjet u përfshi nga flakët në korsinë e mbuluar pranë Neuenhof. Zjarri u përhap shpejt në automjetet përreth, duke dëmtuar gjithsej pesë mjete.

Fatmirësisht, të gjithë pasagjerët arritën të dalin në kohë dhe nuk pati të lënduar. Sidoqoftë, disa persona po kontrollohen për thithje të mundshme të tymit, bëri të ditur një zëdhënës i Policisë së Kantonit të Lucernës.

Për shkak të zjarrit, autoritetet kanë ndërprerë qarkullimin në të dy drejtimet, duke shkaktuar bllokim trafiku prej rreth pesë kilometrash në secilën anë, transmeton albinfo.ch.

Policia ka bërë të ditur se ende nuk dihet se kur do të rihapet rruga për qarkullim. Ndërkohë, Klubi Zviceran i Automobilizmit (TCS) rekomandon rrugë alternative për udhëtarët:

Nga Berna për në Cyrih: përdorni A2/A14/A4/A3 nga kryqëzimi A1 Wiggertal.

Nga Bazeli për në Cyrih: përdorni A2/A1 nga kryqëzimi A2 Augst.

Nga Rheinfelden për në Cyrih: përdorni A3/A2/A1 nga kryqëzimi A3 Rheinfelden.

Autoritetet po punojnë për pastrimin e zonës dhe rikthimin e sigurisë në rrugë sa më shpejt të jetë e mundur. Hetimet për shkaqet e saktë të shpërthimit të zjarrit janë në vijim, transmeton albinfo.ch.