Zjarri në Crans-Montana: Mjekët paralajmërojnë rritje të numrit të viktimave

Tragjedia në Crans-Montana nuk ka përfunduar: mjekët presin viktima të tjera

Pas zjarrit shkatërrues që shpërtheu në barin “Le Constellatio” në Crans-Montana të kantonit Valais, situata shëndetësore e shumë të mbijetuarve mbetet kritike. Sipas mjekëve, ekziston rreziku real që numri i viktimave të rritet edhe në ditët në vijim, pavarësisht përpjekjeve intensive mjekësore, përcjell albinfo.ch.

Zjarri, i cili deri më tani ka marrë të paktën 40 jetë njerëzish, ka lënë mbi njëqind persona të lënduar, prej të cilëve rreth 100 kanë pësuar djegie të rënda. Shumica e tyre po trajtohen në repartet e kujdesit intensiv, të intubuar dhe të lidhur me aparate respiratore, shkruan blick.

Mjekja gjermane Leila Harhaus-Wähner, drejtuese e një prej qendrave më të mëdha të djegieve në Evropë, me seli në Berlin, ka përshkruar gjendjen dramatike të pacientëve në një intervistë për revistën gjermane Der Spiegel. Ajo thekson se, edhe me teknologjinë më të avancuar mjekësore, mbijetesa e pacientëve me djegie të rënda nuk mund të garantohet gjithmonë.

Sipas Harhaus-Wähner, sistemi shëndetësor zviceran nuk ka kapacitet të mjaftueshëm për të trajtuar një numër kaq të madh të plagosurish rëndë. Për këtë arsye, autoritetet kanë kërkuar ndihmë ndërkombëtare. Më shumë se 40 pacientë pritet të transferohen në qendra të specializuara në Gjermani dhe vende të tjera evropiane.

Trajtimi i djegieve të rënda është një proces i gjatë, kompleks dhe jashtëzakonisht i vështirë. Në shumë raste, pacientët humbasin një pjesë të madhe të lëkurës së tyre. “Kur digjet 50, 60 apo 70 për qind e lëkurës, mbetet shumë pak për t’u përdorur”, shpjegon mjekja. Megjithatë, falë zhvillimeve mjekësore, sot është e mundur të trajtohen edhe pacientë me deri në 90 për qind të lëkurës së djegur, duke përdorur qeliza të lëkurës të rritura në laborator dhe zëvendësues artificialë.

Pavarësisht këtyre përparimeve, rreziku i infeksioneve mbetet shumë i lartë dhe paraqet një kërcënim të vazhdueshëm për jetën e pacientëve. “Fatkeqësisht, duhet pranuar se ka shumë të ngjarë të ketë viktima të tjera”, paralajmëron Harhaus-Wähner.

Edhe ata që arrijnë të mbijetojnë, shpesh mbeten me pasoja të rënda fizike dhe psikologjike, të cilat mund t’i shoqërojnë për gjithë jetën. Tragjedia në Crans-Montana ka tronditur jo vetëm Zvicrën, por edhe opinionin ndërkombëtar, duke nxjerrë në pah rrezikun e madh dhe pasojat afatgjata të zjarreve në ambiente të mbyllura.

---