Zubin-Potok: Gjenden armë të gjata, granata e municion, një i arrestuar

Ministri i Punëve të Brendshme të Kosovës, Xhelal Sveçla, ka njoftuar se Policia e Kosovës ka bastisur një lokacion në fshatin Uglarë të Zubin Potok, ku janë gjetur armë dhe mjete eksplozive si granatë dore, armë e gjatë, municion, radiolidhje, antiplumba dhe pajisje teknologjike.

Përmes një postimi në rrjetin social “Facebook”, ai ka njoftuar se është arrestuar një person, të cilit i janë gjetur armët dhe mjetet eksplozive, transmeton albinfo.ch.

“Vijon suksesshëm angazhimi ynë në ç’rrënjosjen e krimit dhe largimin e mbetjeve kriminale të Serbisë në vendin tonë. Armë dhe mjete eksplozive si granatë dore, armë e gjatë, municion, radiolidhje, antiplumba e pajisje teknologjike janë zbuluar sot nga Policia e Kosovës gjatë bastisjes në një lokacion në fshatin Uglarë të Zubin Potokut. Personit të cilit i janë gjetur këto armë e pajisje është arrestuar dhe lënda është proceduar në Prokurori”, ka shkruar ai.

Tutje ai ka shkruar se nuk ka kompromis ndaj krimit, individëve apo grupacioneve që cenojnë sigurinë e vendit dhe qytetarëve të Kosovës.

“Nuk do të ndalemi së punuari në mbrojtje të interesave tona shtetërore, siguri ndaj vendit e qytetarëve tanë, sundim të rendit dhe ligjit në çdo cep të Republikës sonë”, ka shkruar ndër të tjera ai.