Zveçan: Kapet sasi e madhe armatimi, Sveçla raporton se është gjetur “një arsenal armësh”

Foto sc "FB": Xhelal Sveçla

Policia e Kosovës ka njoftuar se është sekuestruar sasi e madhe armatimi në fshatin Vallaq të Zveçanit, pas një bastisjeje mes njësive policore, KFOR-it dhe EULEX-it.

Raportohet se janë gjetur dhe konfiskuar armë, municione, granata dore dhe zolla në një stallë kuajsh.

Gjatë dy bastisjeve të tjera, një në Mitrovicë të Veriut e një në Zveçan, bëhet e ditur se kanë gjetur jelekë antiplumb, fishekë dhe 14 kartela grafike.

Për aksionin ka shkruar ministri në detyrë i Punëve të Brendshme, Xhelal Sveçla, që tha se armatimi i kapur është “arsenal i mjaftueshëm për një njësit terrorist”.

Ai ka thënë se armatimi i rëndë është gjetur në një objekt që i përket politikanit serb, Aleksandar Arsenijeviq, transmeton albinfo.ch.

“Krimi nuk mund të fshihet kurrë, pavarësisht petkut që vesh. Veçanërisht përballë institucioneve tejet vigjilente e profesionale që po punojnë pa u ndalur në ofrimin e sigurisë e sundimit të rendit e ligjit në çdo cep të territorit të Republikës së Kosovës. Nuk do të ndalemi derisa në çrrënjosjen e plotë të mbetjeve kriminale e terroriste të Serbisë nga vendi ynë”, thuhet në njoftimin e tij në Facebook.