Zvicër: 86.3 miliardë franga ishin shpenzimet shëndetësore gjatë 2021

Pixabay: Ilustrim

Zyra Federale e Statistikave ka nxjerrë të dhëna se zviceranët shpenzuan në shërbime shëndetësore gjatë 2021 më shumë se vitet paraprake, përcjellë albinfo.ch.

Në vitin 2021, çdo zviceran shpenzoi mesatarisht 827 franga në muaj për shëndetin e tyre. Në total në vitin 2021, shpenzimet shëndetësore arritën në 86.3 miliardë franga, 5.9% më shumë krahasuar me vitin 2020. Rritja mesatare gjatë pesë viteve të mëparshme ishte 3%, shkruan RTS.

Nga 827 franga të shpenzimeve mesatare mujore për banor, ky i fundit në fakt paguan 184 në formën e pjesëmarrjes në kostot e sigurimit dhe pagesat direkte. Këto janë kryesisht kosto për institucionet mjekësore-sociale, kujdesin dentar, si dhe zbritjet dhe kontributet në kostot e trajtimit. Kjo shumë nuk përfshin primet e sigurimit apo taksat, përcjellë albinfo.ch.

Sigurimi i detyrueshëm shëndetësor është 296 franga, shteti 190 franga, sigurimet shoqërore (AVS, AI, aksidente) 74 franga dhe sigurimi privat 54 franga, ka llogaritur Zyra e Statistikave. Gjendja prej 29 frangash paguhet nga burime të ndryshme financimi, për shembull donacione.

Ndërkohë që janë shërbimet shëndetësore shtetërore ato që kanë përjetuar rritjen më të fortë midis 2020 dhe 2021, me 74.6% ose 1.8 miliardë franga. Kjo për shkak të shpenzimeve të larta që lidhen me pandeminë, përcjellë albinfo.ch.

Shpenzimet spitalore u rritën me 4.4%, ato të praktikave mjekësore me 2.6%. Rritje janë shënuar edhe për kujdesin dentar dhe shërbimet e tjera ambulatore. Kostot e institucioneve mediko-sociale ranë me 1.1%, shkruan RTS.

Me këtë rritje prej 4.8 miliardë frangash gjatë një viti, shpenzimet shëndetësore përfaqësonin 11.8% të produktit të brendshëm bruto të Zvicrës në vitin 2021, krahasuar me 11.7% të një viti më parë.