Zvicër: 90% e restoranteve të rihapura punojnë me humbje

Qarkullimi i restoranteve që nga rihapja është mesatarisht 60 për qind nën vlerat e një viti më parë

Hapja e restoranteve dhe lokaleve tjera hoteliere , që u bë më 11 maj, ishte pritur me entuziazëm nga pronarët dhe klientët, gjithandje në Zvicër, shkruan albinfo.ch. Por tani, ende pa u mbushur dy javë nga “kthimi në normalitet”, shumica e madhe e operatorëve në këtë fushë shprehen të pakënaqur.

Qarkullimi i restoranteve që nga rihapja është mesatarisht 60 për qind nën vlerat e një viti më parë. 40 për qind e mbi 3000 kompanive të anketuara nuk e dinë nëse do të munden t`i mbajnë të hapura lokalet e tyre në qershor.

Këto rezultate dalin nga një studim në internet, i realizuar nga shoqata e gastronomëve, Gastrosuisse me gjithsej 3,172 anëtarë, përcjell albinfo.ch. Sipas shoqatës, bëhet fjalë për rezultatet e para të besueshme pas rihapjes së lokaleve nën kushtet e rrepta të mbrojtjes nga Covid-19.

Në shikim të parë, jepet përshtypja për një degë ekonomie që ka rifilluar punën me zell të madh: 87 për qind e drejtuesve të restoranteve dhe hoteleve të anketuar janë përsëri duke marrë klientë. Pothuajse katër për qind kanë deklaruar se ata duan të fillojnë vetëm në momentin kur qeveria federale të heqë plotësisht masat mbrojtëse, përcjell albinfo.ch. Nëntë për qind po mendojnë ta bëjnë rihapjen në maj ose qershor.

Shoqata Gastrosuisse ka kërkuar nga Qeveria Federale të heqë edhe disa nga masat, të cilat kufizojnë funksionimin e lokaleve. Një ndër masat do të ishte shkurtimi i distancës mbrojtëse nga dy metra sa është tani, në një metër, transmeton albinfo.ch. Po ashtu Gastrosuisse dëshiron të hiqet kufizimi i punës deri në orën 24.00

 

---