Zvicër: Afër 24 mijë kërkesa të reja azili gjatë vitit 2014

Rritja prej 11 për qind e shënuar në Zvicër është dukshëm më e vogël po u krahasua me trendin e rritjes në shtetet tjera të Evropës Perëndimore

Gjatë vitit të kaluar në Zvicër kanë kërkuar azil 23.765 persona, që është për 11 për qind më shumë se një vit më parë. Zonat e krizës rreth Mesdheut dhe konfliktet në Afrikë janë shkaktarët kryesorë të rritjes së këtij numri. Për pasojë, gjatë vitit të kaluar ka pasur dukshëm më shumë njerëz që përmes rrugës detare ia kanë mësyrë Italisë dhe përmes saj edhe shteteve tjera të Evropës Perëndimore.

Vetëm në brigjet italiane kanë zbarkuar 170 mijë refugjatë, që është katër herë më shumë se një vit më parë

Me gjithë këtë numër, rritja e shënuar në Zvicër është dukshëm më e vogël po u krahasua me trendin e rritjes së madhe në shtetet tjera të Evropës Perëndimore. Kështu, siç bën të ditur Sekretariati Shtetëror për Migracion (SEM) – ish Zyra Federale për Migracion, në Evropë, azil kanë kërkuar rreth 600 mijë persona, duke shënuar kështu një rrije prej 35 për qind. Vetëm në Gjermani janë regjistruar 202 mijë kërkesa azili gjatë vitit 2014.

Marrë në përgjithësi, përqindja e azilkërkuesve që janë ndalur në Zvicër në totalin e kërkesave të azilit në gjithë Evropën, ka shënuar një rënie. Përderisa në vitin 2013 në Zvicër ishin shënuar 4.8% të të gjitha kërkesave për azil në shkallë evropiane, në vitin 2014, kjo përqindje ka rënë në 4%.

Vendi nga i cili kanë ardhur më shumë azilkërkues në Zvicër është sërish Eritrea. Nga ky shtet afrikan janë regjistruar 6923 kërkesa azili që në krahasim me një vit më parë, kur ishin 4360 sish, përbën një rrije shumë të madhe, plot 170 për qind. Pas Eritresë, më së shumti azilkërkues ka pasur nga Siria, 3819 gjegjësisht +101 për qind. Në vendin e tretë vijnë kërkesat e azilit nga Sri Lanka. Nga ky vend kanë ardhur 1277 azilkërkues ose 87 për qind më shumë se një vit më parë.

Gjatë vitit 2014 janë zgjidhur në shkallën e parë 26715 kërkesa azili ose për 2749 më shumë se gjatë vitit 2013.

Sa i përket përqindjes së njohjes së statusit të refugjatit, viti 2014 shënon një rritje të madhe. 6199 persona ose dy fish më shumë se një vit më parë kanë marrë statusin e refugjatit, gjegjësisht u është njohur azili. Shkalla e njohjes ë këtij statusi gjatë 2014-ës ka qenë 26 për qind.