Zviceranët më optimistë se gjermanët për të ardhmen

(KEYSTONE/Ennio Leanza)

Një studim i fundit i sociologut gjerman Rüdiger Maas ka zbuluar se të rinjtë zviceranë janë më të sigurt dhe më optimistë për të ardhmen në krahasim me ata gjermanë. Hulumtimi, i realizuar mbi të rinjtë nga 16 deri në 29 vjeç, tregon një diferencë të dukshme në nivelin e mirëqenies dhe besimit ndaj institucioneve publike mes dy vendeve, shkruan The Local, transmeton albinfo.ch.

Sipas rezultateve, mbi 80 përqind e të rinjve në Zvicër ndjehen krenarë për vendin e tyre, ndërsa vetëm 40 përqind janë të gatshëm ta mbrojnë atë në rast konflikti të armatosur. Gjithashtu, 20 përqind e tyre janë të përgatitur të sakrifikojnë jetën për atdheun.

Në anën tjetër, vetëm 39 përqind e të rinjve gjermanë shprehin besim në institucionet shtetërore, ndërsa ndjenja e shqetësimit për të ardhmen është më e theksuar në këtë grupmoshë.

Rezultatet tregojnë një lidhje më të fortë të rinisë zvicerane me shtetin dhe një nivel më të lartë të sigurisë dhe mirëqenies, ndryshe nga rinia gjermane, e cila përballet me sfida më të mëdha për optimizmin ndaj të nesërmes, transmeton albinfo.ch.