Shkurt.ch

Zvicra i jep fund “terrorit telefonik” të arkave shëndetësore!

Do të ndalohen, për shembull, telefonatat pa marrëveshje ose konsultime paraprake apo pa pasur paraprakisht një marrëdhënie afariste

Me siguri të gjithëve na ka ndodhur, madje shpeshherë, që të na mërzisin me telefonata të bezdisshme njerëz të panjohur që na ofrojnë shërbime, që kryesisht kanë të bëjnë me sigurimin shëndetësor. E pra, ky “terror telefonik” do të ndërpritet. Kjo bëhet e ditur pas një votimi të bërë nga Dhoma Nacionale e Parlamentit të Zvicrës, në të cilin është vendosur me shumicë votash që të kufizohen telefonatat e brokerëve dhe provizionet e tepruara sa i përket sigurimit bazë dhe atij komplementar shëndetësor, shkruan 20minuten.ch.

Kështu, do të ndalohen, për shembull, telefonatat pa marrëveshje ose konsultime paraprake apo pa pasur paraprakisht një marrëdhënie afariste, transmeton albinfo.ch.

Brokerët e arkave të sigurimit shëndetësor, në të ardhmen do të detyrohen që të dëshmojnë një shkallë kualifikimi, në mënyrë që të jetë i siguruar kualiteti për klientët. Po ashtu, në këto raste do të bëhet e detyruar mbajtja e një protokolli, i cili duhet të nënshkruhet nga të dyja palët. Shkeljet e rregullave do të sanksionohen me gjoba të larta.

Lidhur me sigurimet komplementare, Komisioni përkatës i Dhomës Nacionale e ka zgjeruar mocionin e votuar njëzëri nga Dhoma e Kantoneve në atë mënyrë që në të ardhmen do të mund të kufizohen edhe provizionet e sigurimit plotësues fitimprurës, përcjell albinfo.ch. Po ashtu duhet të vendosen edhe kufijtë e sipërm të kompensimit, një vendim i mbështetur më parë edhe nga Dhoma e Vogël (Dhoma e Kantoneve ose Senati) e Parlamentit.

Zëdhënësja e komisionit, Bea Heim ka vënë në duje se edhe dega e sigurimeve i qëndron mbrapa projektit dhe e konsideron të nevojshëm zgjerimin e kërkuar në sigurimin komplementar.