Zvicra kërkon ujë cilësor në Kosovë

Qeveria e Zvicrës, si donatorja më madhe në sektorin e ujit, ka kërkuar nga institucionet e Kosovës që të punohet në përmirësimin e cilësisë së ujit të pijes

Që nga viti 1999, Qeveria e Zvicrës ka investuar rreth 70 milionë euro në sektorin e ujërave në Kosovë, prandaj kërkon qasje të barabartë në ujë dhe në kanalizim si nevojë themelore për të gjithë qytetarët. Kështu ka deklaruar ambasadorja e Zvicrës në Kosovë, Kristina Marty- Lang me rastin e Ditës Ndërkombëtare të Ujit.

“Qeveria e Zvicrës së bashku me Qeverinë e Kosovës dhe me donatorë të tjerë ka përkrahur sektorin e sanitarisë dhe të ujit në Kosovë që nga infrastruktura ujore deri tek ndërtimi i institucioneve dhe çështje që kanë të bëjnë me ujin”, tha Marty- Lang, sipas të cilës, Zvicra është një nga investitorët më të mëdhenj në sektorin e ujit.

“Qeveria e Zvicrës është optimiste se përmirësimi i performancës së stafit dhe të menaxherëve te institucioneve publike Kosova do të përfitojë me cilësi më të mira të ujit si për nga cilësia ashtu edhe nga sasia me një çmim të arsyeshëm”, tha diplomatja helvetike e cila kërkoi që Kosova të këtë një cilësi më të mirë të ujit.

Ndërsa kryeministri Isa Mustafa tha se ekzisto nevoja që në Kosovë të investohet për ta mbrojtur ujin e pijshëm. “Me Programin Qeverisës por edhe me planet e Ministrisë ne i kemi identifikuar projektet dhe zonat në të cilat do të investojmë”, deklaroi kryeministri kosovar.