Zvicra me ambasadore të re në Shqipëri

Ambasadorja e re e Zvicrës zj. Ruth Huber paraqet kredencialet tek Presidenti Begaj

Tashmë  Zvicra ka një ambasadore të re në Shqipëri: Zj. Ruth Huber e cila paraqiti kredencialet diplomatike tek Presidenti Begaj, shkruan albinfo.ch.

Presidenti i uroi suksese Ambasadores Huber në kryerjen e misionit të saj diplomatik në Shqipëri dhe shprehu besimin shprehu besimin, se falë eksperiencës së saj, marrëdhëniet e shkëlqyera midis dy vendeve do të progresojnë edhe më shumë, në të gjitha fushat me interes të ndërsjellë.

Në mënyrë të veçantë, Presidenti Begaj, vlerësoi ndihmën dhe kontributin e vyer që Zvicra i ka dhënë Shqipërisë, në tre dekadat e fundit, për zhvillimin ekonomiko-social të vendit, si dhe shprehu besimin se përmes vijimit të Programit të Bashkëpunimit Zviceran për Shqipërinë, për periudhën 2022-2025, do të konsolidohen edhe më tej kapacitetet institucionale si në nivel të qeverisjes vendore ashtu dhe në atë qendror.

Ambasadorja Huber theksoi se Zvicra vijon të jetë një partnere e përkushtuar për zhvillimin e Shqipërisë dhe mirëpret forcimin e këtij partneriteti si në rrafshet dypalëshe, ashtu edhe shumëpalëshe, përfshirë Këshillin e Sigurisë së Kombeve të Bashkuara.

---