Zvicra, në stërvitjet ajrore të NATO-s në Itali

(KEYSTONE/Martin Ruetschi)

Zvicra po merr pjesë në një stërvitje ajrore të NATO-s në Italinë jugore nga 2 deri më 13 tetor, për të ndihmuar në forcimin e kapaciteteve të mbrojtjes dhe bashkëpunimit ndërkombëtar.

Ushtria zvicerane do të dërgojë 45 ushtarë në “Takimin e Tigrave” të NATO-s në Gioia del Colle, në Italinë jugore, tha Departamenti Federal i Mbrojtjes në një deklaratë, shkruan swissinfo.

Pilotët do të thellojnë njohuritë e tyre nëpërmjet pjesëmarrjes së pesë avionëve F/A-18, teksa kjo stërvitje ajrore është një nga më të mëdhatë e organizuara në Evropë.

Në total, 13 vende marrin pjesë me mbi 70 avionë luftarakë, 15 helikopterë dhe 1500 ushtarë.

Objektivi është testimi i mbrojtjes ajrore përtej kufijve (skenari i veprimit të forcës së përbashkët), shkëmbimi i përvojave dhe krahasimi i aftësive, përcjell albinfo.ch.

Çdo vit, Takimi i Tigrave të NATO-s mirëpret forcat ajrore të disa vendeve të Organizatës së Traktatit të Atlantikut të Veriut (NATO).

Ndryshe, Zvicra merr pjesë si anëtare e programit të Partneritetit për Paqe të NATO-s ndërsa forca ajrore zvicerane ka qenë anëtare e Shoqatës së Tigrave të NATO-s që nga viti 1981 dhe ka marrë pjesë në Takimin e Tigrave që nga viti 2004.