Zvicra shkruan historinë, hap tunelin më të gjatë hekurudhor në botë

Ceremonia e inaugurimit të tunelit më të gjatë hekurudhor në botë fillon sot të mërkurën, pas 17 viteve të punës

Tuneli i Gotthard-it është një simbol i identitetit dhe zhvillimit të Zvicrës. Pikë takimi në mes të gjuhëve dhe kulturave të vendit, meqë  gjithashtu është një nga rrugët kryesore në mes të Evropës veriore dhe jugore. Me hapjen e një tuneli të ri bazë më 1 qershor 2016 – tuneli më i gjatë në botë me 57 km – Gotthard shkruan një kapitull të rëndësishëm në historinë e transportit hekurudhor.

Ceremonia e inaugurimit të tunelit më të gjatë hekurudhor në botë fillon sot të mërkurën, pas 17 viteve të punës, transmeton albinfo.ch mediat zvicerane. Shtatë këshilltarë federal si  dhe më shumë se 1000 të ftuar priten për të marrë pjesë në këtë ceremoni.

Kancelaria gjermane Angela Merkel, presidenti francez François Hollande dhe kryeministri italian Matteo Renzi marrin pjesë në përurimin, por edhe Komisionerja e  transportit e BE-së Violeta Bulc. Ndërsa të tre udhëheqësit kryesorë të BE-së nuk do të jenë të pranishëm në këtë  pagëzimin që përfaqëson një “punë shekullore”.

Ceremonia e hapjes, e cila do të përcillet nga gazetarët që vijnë nga  gjithë bota, do të fillojë në mesditë. Presidenti i Konfederatës Johann Schneider-Ammann dhe ministrja e transportit Doris Leuthard do të jenë të pranishëm në Pollegio dhe do të mbajnë fjalën e hapjes në të njëjtën kohë, shkruan albinfo.ch. Këshilli Federal dhe deputetët do të jenë të pranishëm në festimet që bëhen me këtë rast.

“Tutti insieme”

Zyrtarët e pranishëm në Rynächt do të kalojnë tunelin në fillim të pasdites. Ata do të udhëtojnë deri në Pollegio, ku do të zhvillohet pjesa tjetër e ditës. Për arsye kohe, persona që do të vine vonë do të mbeten pa këtë udhëtim. Në Ticino, të ftuarit do të zbulojnë një pjesë të tunelit  duke shijuar gastronominë vendore.

Organizatorët presin shumë mysafirë në këtë manifestim. Rreth 100.000 njerëz pritet të kalojnë tunelin gjatë fundjavës. Një festival do të mbahet në katër anët e  Gotthard-it.