12 kompani nga Kosova prezantohen në panairin “Gulfood” në Dubai

Mësohet se 12 kompani nga Kosova janë duke prezantuar produktet e tyre në Panairin “Gulfood 2025”, që po mbahet në Dubai, Emiratet e Bashkuara Arabe, nga data 17 deri më 21 shkurt 2025, përcjell albinfo.ch.

MINT/KIESA, ka siguruar hapësirën ekspozuese prej 96 m², për kompanitë kosovare, ku vizitorët dhe blerësit ndërkombëtarë do të kenë mundësinë të njihen nga afër me cilësinë dhe potencialin e produkteve që ofrohen nga Kosova.

Kompanitë kosovare që po marrin pjesë në këtë panair janë: “Fluidi Group”, “Vitafood”, “Ananasi Impex”, “Camel”, “Frutti”, “Jaffa Plus”, “Agro-Florentina”, “A-D-E Group”, “Fresh-Co”, “Happy”, “Afri Trade” dhe “DG PACK”. Ato po ekspozojnë një gamë të gjerë produktesh nga sektori i ushqimit, pijeve dhe higjienës dhe po zhvillojnë kontakte me partnerë potencialë për zgjerimin e tregjeve të eksportit.

Shtandin e Kosovës në këtë panair e vizitoi edhe ambasadori i Republikës së Kosovës në Emiratet e Bashkuara Arabe z. Xhabir Hamiti.

Ky aktivitet përbën një mundësi të shkëlqyer për kompanitë kosovare për të zgjeruar praninë e tyre në tregjet ndërkombëtare dhe për të krijuar mundësi të reja për bashkëpunim dhe rritje të eksporteve.