Lajme

19-vjeçari shqiptar braktis Italinë për vendlindje

I shkolluar për ekonomi në Itali, vendos të kthehet në vendlindje

I riu shqiptar, Mateo Pasho, është vetëm 19 vjeç dhe sot është shef kuzhine. Lindur dhe rritur në Itali, i diplomuar për ekonomi ndërkombëtare, vendosi që të ndjekë pasionin dhe të rikthehet pikërisht në Vlorë, përcjell albinfo.ch.

“Më pëlqen Vlora dhe për pasionin që kam, më jep mundësi të shprehem akoma më mirë te pasioni im që është kuzhina”, tha ai.

Punën që ai bën, e ka të kultivuar nga gjyshërit.

“Kur isha i vogël jam rrit me gjyshet dhe kam marrë shumë nga gjyshet, ata gatuanin, unë u rrija mbrapa, me thoshin bëj këtë, atë dhe atje ka lindur pasioni im me gatimet me prerjet, çdo gjë ta provoja para se ta provojnë të tjerët”, thot Mateo.

Mateos i është dashur të punojë që i vogël.

“Në kuzhinë kam shtatë vjet që punoj, kam filluar që i vogël. Kam pasur oportunitetin (mundësinë) të punoj që i vogël, ndaj e njoh punën, kam eksperiencë në këtë punë”, shtoi ai.

I dashuruar tashmë me Vlorën, Mateo ka nje apel edhe për bashkëmoshatarët e tij të cilët duan të ikin nga Shqipëria.

“Është shumë gabim dhe atë që them unë të rinjve, mosha ime është që kapni një zanat të mirë dhe vazhdoni ne atë zanat se gjërat vijnë vetë dhe sukseset vijnë vetë”, tha 19-vjeçari.

19-vjeçari tashmë e ka vendosur të ardhmen e tij dhe për këtë është i vendosur.

“Jo s’ do iki më, sepse Vlora është shumë e bukur dhe jep shumë oportunitete”, e mbylli intervistën i riu.