2 milionë të huaj kanë hyrë gjatë vitit në Gjermani

Por kur të llogariten shkuarjet dhe ardhjet, del se në Gjermani ka pasur një shtim «neto» të të huajve prej 1.14 milion vetash

Në Gjermani gjatë vitit 2015 është shënuar një numër rekord i ardhjes së të huajve. Sipas shënimeve të përkohshme të Zyrës Federale për Statistika, të publikuara të hënën, në këtë vend gjatë vitit që shkoi është regjistruar hyrja e afër 2 milionë të huajve. Në këtë shifër përfshihet edhe numri i refugjatëve që kanë paraqitur azil në Gjermani gjatë kësaj periudhe.

Por, po ashtu gjatë vitit 2015 Gjermaninë e kanë braktisur 860 mijë shtetas të huaj, transmeton albinfo.ch. Kur të llogariten shkuarjet dhe ardhjet, del se në Gjermani ka pasur një shtim «neto» të të huajve prej 1.14 milion vetash.

Zyra e përmendur ka theksuar se ky është numri më i madh neto i të huajve që është regjistruar ndonjëherë deri tash në historinë e Gjermanisë. Një vit me parë (2014) kanë qenë 1 milion e 343 mijë të huaj që kanë ardhur në Gjermani. Pasi që po gjatë atij viti Gjermaninë e kanë lëshuar 766 mijë të tjerë, ardhja neto e të huajve ka qenë 577 mijë.

Në fund të vitit 2015 në regjistrin e të huajve në Gjermani janë shënuar 9 milionë e 11 mijë persona ndërsa një vit më parë ishin 8 milionë e 15 mijë.