50% të zviceranëve nuk identifikohen me federalizmin e shtetit të tyre

Megjithatë, më të lidhurit me federalizmin, në bazë të këtij sondazhi rezultojnë banorët e kantonit italishtfolës të Tiçinos

Gjysma e popullsisë së Zvicrës nuk ndjehet aspak ose fare pak e lidhur me federalizmin, gjegjësisht me faktin se vendi funksionon në parimin federal. Këtë gjendje e tregon një sondazh i realizuar me porosi të Konferencës së Qeverive të Kantoneve të Zvicrës, shkruan srf.ch.

Megjithatë, më të lidhurit me federalizmin, në bazë të këtij sondazhi rezultojnë banorët e kantonit italishtfolës të Tiçinos, transmeton albinfo.ch. Pas tyre vijnë qytetarët frankofonë ose të kantoneve të Zvicrës Perëndimore ndërsa më së paku këtë lidhje e perceptojnë qytetarët që i takojnë popullsisë shumicë, asaj të Zvicrës gjermane.

Përveç në baza etnike, dallime janë vu re edhe në kriterin e moshës. Sa më të rinj që kanë qenë të anketuarit, aq më pak janë shprehur të lidhur me federalizmin.

Ndërkaq, 72 për qind të të anketuarve janë të mendimit se sistemi ekzistues nuk duhet të ndryshohet ose nevojiten vetëm përshtatje të vogla.

Për këtë anketë janë pyetur 1200 persona.