550 libra nga Zvicra në 100 vjetorin e shkollës së Koshtovës

Në aksionin e saj më të ri, “DeV“ ka dërguar në Koshtovë të Mitrovicës 550 libra dedikuar shikollës së atjeshme „Jusuf Rexha“ në 100 vjetorin e saj

Shoqata e vyeshme nga Cyrihu „Dora e vendlindjes“ ka përmbyllur këto ditë aksionin e saj të tetë të dergimit të ndihmave në Kosovë. Ndihmat që dërgon kjo shoqatë ndryshojnë nga ato të shoqatave tjera humanitare. Një njërin nga aksionet e saj „Dora e vendlindjes“ ka dërguar makina qepjeje, në tjetrin, veshmbathje dhe pajisje tjera për shtëpitë e pleqve ndërsa tashmë disa herë ajo dërgon në Kosovë libra në gjuhën gjermane për shkollat dhe bibliotekat e Kosovës.

Në aksionin e saj më të ri, “DeV“ ka dërguar në Koshtovë të Mitrovicës 550 libra dedikuar shikollës së atjeshme „Jusuf Rexha“ në 100 vjetorin e saj, bën të ditur përfaqësuesi i kësaj shoqate, Fadil Krasniqi, i cili edhe ka bërë dërgimin e librave nga Zvicra.
Shkolla e fshatit është themeluar në vitin 1915 në kohën e pushtetit të Austrohungarisë, nga atdhetari dhe mësuesi i këtij fshati, Jusuf Rexha, emrin e të cilit e mban sot.

Dhe pikërisht sot, më 5 qershor, në Koshtovë kremtohet jubileu i rrallë, ai i 100 vjetorit të shkollës, me një akademi solemne. Kjo shkollë, së bashku me atë të Zhabarit, si shkollat e para zyrtare në gjuhën shqipe u hapën me iniciativën dhe përkujdesjen e jashtëzakonshme të patriotit dhe arsimdashësit të madh, Hasan Prishtina. Mësuesit e parë ishin, krrahas Jusuf Rexhës edhe Shaban Idrizi dhe Hajrë Haxhia.

Pranimin e librave të dhuruara nga Zvicra, në Mitrovicë e ka bërë Veton Rexha, nipi i mësuesit të parë. Rexha pastaj i ka dorëzuar librat në mënyrë solemne drejtorit të shkollës, Bujar Begut dhe sekretarit, Nexhmedin Hajredini, të cilët kanë shprehur falënderimin e tyre në emrin e personelit dhe nxënësve për dhuratën e ardhur nga bashkatdhetarët nga Zvicra, thotë z. Krasniqi.

---