Në Zvicër linden 220 fëmijë në ditë

Meqë numri i lindjeve ka shënuar një rritje të vogël, diferenca në mes të të lindurve dhe të vdekurve shkon në dobi të të lindurve

“Bilanci” që ka regjistruar Enti Federal i Statistikave për vitin që kaloi është 220 fëmijë të lindur në ditë. Marrë në tërësi, në Zvicër gjatë vitit 2009 janë lindur 80`000 fëmijë, prej tyre 41`000 djem dhe 39`000 vajza. Këto shifra i përgjigjen një shtimi prej 2.2% në krahasim me vitin pararendës.

Në përgjithësi, siç ka bërë me dije enti në fjalë, ka disa vite që linden më shumë foshnja të gjinisë mashkullore se sa femrore.

Numri i të vdekurve gjatë vitit që shkoi ka qenë 62`500 veta. Duke marrë parasysh se numri i lindjeve ka shënuar një rritje të vogël në krahasim me vitin paraprak, diferenca në mes të të lindurve dhe të vdekurve është rritur, në dobi të të lindurve.

Numri mesatar i fëmijëve të lindur për një grua të moshës për lindje është rritur nga 1.5 në 1.53. ndërsa mosha mesatare e nënave që kanë lindur fëmijë është 31.2 vjeç.

Gjatë të njëjtës periudhë janë realizuar 42`800 martesa, që është 2.1% më shumë se në vitin 2009 dhe janë shkurorëzuar 21`500 çifte.