De Biasi dëshiron fitore ndaj Zvicrës

De Biasi dëshiron fitore ndaj Zvicrës “Në fushë duan të fitojnë të gjithë. Xhaka do të luajë kundër vëllait të tij për ta mundur, gjithçka tjetër janë thashetheme të kota”, deklaroi italiani

(AP Photo/Hektor Pustina)

Shqipëria të dielën luan me Katarin një ndeshje shumë të rëndësishme për të parë formën e lojtarëve para Evropianit. “Është ndeshja e parë pas më shumë se dy muajsh e gjysmë dhe jam shumë kureshtar të shikoj gjendjen e skuadrës. Kjo ndeshje do të më ndihmojë mua të dal në disa përfundime. Vendimin e listës së lojtarëve që do të vijnë në Francë, do ta marr në datën 31 pas stërvitjes së fundit dhe më pas do të bëj zgjedhjen përfundimtare. Të gjithë meritojnë të vijnë në Francë. Vendimi do të jetë shumë i kujdesshëm, por edhe i dhimbshëm sepse çdo lojtar e konsideroj si djalin tim dhe nuk është aspak e lehtë të heq dorë nga ndonjëri prej tyre”, u shpreh De Biasi në konferencën për media, përcjell albinfo.ch.

Trajneri italian ka folur edhe për të ardhmen e tij, duke iu përgjigjur mediave se ai do të largohet pas Evropianit. “Janë muhabete baresh dhe gazetash. Unë jam i interesuar për punën e skuadrës dhe për të motivuar grupin që të arrijmë diçka të rëndësishme duke dhënë 110 % të mundësive tona. Gazetat mund të thonë çfarë të duan, por janë njerëzit ata që ndajnë të vërtetën nga gënjeshtra”.

Në fund trajneri italian foli edhe për ndeshjen ndaj Zvicrës. “Nuk dua të flas për këto gjëra. Kur dikush zbret në fushë mban një fanellë dhe luan ndaj kundërshtarëve, ai nuk mendon për të shkuarën. Në fushë duan të fitojnë të gjithë. Xhaka do të luajë kundër vëllait të tij për ta mundur, gjithçka tjetër janë thashetheme të kota. Askujt nuk i intereson se nga vjen, atyre që luajnë për Zvicrën nuk u shkon mendja se nga vijnë”, përfundoi De Biasi.