Calmy-Rey: Padi Gadafit për mbajtjen peng të zviceranëve

Arsye për padinë është fakti se dy ish pengjet janë në shtëpi ndërsa Ambasada e Zvicrës në Tripoli tashmë është e mbyllur, ka thënë Rey

Presidentja e Zvicrës, Micheline Calmy-Rey, në intervistat që ka dhënë për dy gazeta zvicerane që botohen të dielën, (“NZZ am Sonntag” dhe “Sonntag”) ka deklaruar se diktatori libian, Gadafi do të paditet për mbajtjen peng të dy qytetarëve zviceranë.

Ajo, me këtë rast u ka bërë thirrje organeve zvicerane të drejtësisë që të nxjerrin para gjyqit regjimin e Gadafit për rrëmbimin dhe mbajtjen rreth dy vjet peng të zviceranëve Max Göldi dhe Rachid Hamdani.

Siç dihet, kjo mbajtje peng kishte shkaktuar një krizë të rëndë diplomatike në mes të Zvicrës dhe Libisë.

Calmy Rey ka përmendur „ndryshimin thelbësor të rrethanave” si faktor për ngritjen e një padie të tillë. Ky ndryshim ka të bëjë me faktin se, dy ish pengjet janë në shtëpi ndërsa Ambasada e Zvicrës në Tripoli tashmë është e mbyllur.

„Tashti jemi të lirë në veprimet tona” ka thënë presidentja e vendit, njëherësh ministre e jashtme, Micheline Calmy-Rey.