Terrorizmi trondit Stambollin, dhjetëra të vrarë e qindra të plagosur

Në sulmin terrorist në aeroportin «Ataturk» të metropolit turk më shumë se 30 njerëz janë vrarë. Tre kamikazë shkaktuan të paktën vdekjen e 31 personave, tha guvernatori i Stambollit, Vasip Sahin. Kanali televiziv turk «NTV» raportoi, duke cituar spitalet, se janë më shumë se 100 të plagosur në sulmin në aeroportin më të madh në Turqi. Ministri i Drejtësisë, Bekir Bozdag, tha gjatë natës se ka shkuar numri i viktimave deri tani në 31, ndërsa janë plagosur 147.

Pjesa më e madhe e viktimave ishin turq, në mesin e të vdekurve dhe të të plagosurve, por kishte edhe shtetas të huaj. Detajet e sakta për nacionalitetin e viktimave nuk janë bërë të ditura.

Pamjet e publikuara tregojnë për tmerrin që kanë përjetuar pasagjerët në aeroportin “Ataturk”. Shihet edhe njëri prej sulmuesve, i cili ka shtënë me kallashnikov në parkimin e aeroportit, si një taktikë e njohur për të shpërqendruar vëmendjen e policisë.

Agjencia e lajmeve DHA ka raportuar se në dy lokacione të ndryshme në aeroport kanë ndodhur sulmet terroriste.

Ardhjet dhe shkuarjet e aeroplanëve në aeroportin më të madh të Turqisë janë bllokuar plotësisht.

Grupi kurd separatist PKK dhe milicia terroriste e Shteti Islamik ISIS që nga vera e 2015-ës kanë kryer një numër të sulmeve të rënda në Turqi. Në dy nga sulmet në Stamboll kishin pësuar edhe turistë të huaj. Shtimi i dhunës që nga vera e vitit 2015 ka çuar në një rënie të konsiderueshme të turizmit, një shtyllë e ekonomisë turke.

Aeroporti “Ataturk” është i 11-ti në botë përsa i përket trafikut të fluturimeve.