Anulohen zgjedhjet presidenciale në Austri

Partia e Lirisë dhe kandidati i saj Norbert Hofer kanë kundërshtuar rezultatin e zgjedhjeve ku pretendohej se në numërimin e votave me postë kishte parregullsi

Gjykata më e lartë e Austrisë ka anuluar zgjedhjet presidenciale të mbajtura më 22 maj ku fitues u shpall kandidati i të gjelbërve, Alexander Van der Bellen përball kandidatit të ekstremit të djathtë, Partisë së Lirisë, Norbert Hofer.

Partia e Lirisë dhe kandidati i saj Norbert Hofer kanë kundërshtuar rezultatin e zgjedhjeve ku pretendohej se në numërimin e votave me postë kishte parregullsi.

Mu për këtë Gjykata  e Austrisë të premten shpalli të pavlefshme zgjedhjet dhe ka vendosur që të dy kandidatët të kërkojnë edhe një herë votën e popullit. Sipas mediave austriake, zgjedhjet e reja pritet të mbahen në muajin shtator apo tetor.

Në rast se arrin të fitojë kandidati i Partisë së Lirisë, Hofer do të bëhet i pari politikan i ekstremit të djathtë që bëhet udhëheqës i një vendi anëtar të BE-së.

Partia e Lirisë e ka udhëhequr fushatën duke u mbështetur në shqetësimet rreth imigracionit dhe rënies së standardit të jetesës, ndërsa deklarata e tij se “Kosova është Serbi” ka zemëruar shumë komunitetin shqiptar që jeton në Austri dhe më gjerë.