Sommaruga: Procedura e azilit, tepër e gjatë

Departamenti për drejtësi dhe punë policore del me një raport me propozime për shkurtimin e procedurës së azilit

Ministrja e drejtësisë Simonetta Sommaruga është e interesuar për një shkurtim të ndjeshëm të procedurës së azilit. Në emisionin “Rundschau” të televizionit publik të Zvicrës, ajo është ankuar se procedura në fjalë zgjat tepër shumë, prandaj duhet ndërmarrë diçka në atë drejtim.

Një procedurë azili, sipas rregullit, zgjat dy deri në tre vjet. Brenda një kohe kaq të gjatë, azilkërkuesit tashmë janë adaptuar në Zvicër, kanë mësuar gjuhën dhe fëmijët e tyre kanë hyrë në procesin arsimor.

Departamenti për drejtësi dhe punë policore, sipas ministres Sommaruga, ka përpiluar një raport i cili do të diskutohet javën e ardhshme në komisionin për politikën shtetërore të Dhomës së kantoneve në Parlamentin Nacional.

Raporti përmban propozime për shkurtimin serioz të procedurës së azilit.