Çiklisti i Kosovës aksidentohet në Rio

Sipas raportimeve, Guri ishte dërguar menjëherë në emergjencë, por pas kontrollimit u tha nga mjekët se gjendja e tij është stabile

Çiklisti i vetëm kosovar Qëndrim Guri është përfshirë në një aksident rrugor në Rio de Zhaneiro të Brazilit. 22-vjeçari, sipas “DailyMail”, është goditur nga një veturë teksa ngiste biçikletën e tij në “Avenida das Americas”, autostrada më e madhe në zonën perëndimore të Rios, shkruan albinfo.ch.

Sipas raportimeve, Guri ishte dërguar menjëherë në emergjencë, por pas kontrollimit u tha nga mjekët se gjendja e tij është stabile. Por, gjithnjë sipas tabloidit anglez, ambulanca që kishte ardhur për Gurin ishte vonuar plotë 40 minuta.

Lajmi për aksidentimin e tij u konfirmua edhe nga Komiteti Olimpik i Kosovës.

Garën e tij në Lojëra Olimpike, Guri e përfundoi më 6 gusht, por ka shfrytëzuar mundësinë për të vazhduar në këto lojëra edhe pse është eliminuar.

“Daily Mail” tregon edhe për karrierën e tij dhe se ishte shpallur çiklisti më i mirë në Kosovë. Kosova mori pjesë për herë të parë në Lojërat Olimpike, ku Majlinda Kelmendi arriti të stoliset me medaljen e artë.