Gani Gërguri, guvernator i BQK-së

Gani Gërguri, ish zëvendës i guvernatorit, është votuar sot nga parlamentarët e Kosovës për në postin vakant të guvernatorit të Bankës Qendrore të Kosovës. Për Gërgurin kanë votuar 58 deputetë.

Në postin e guvernatorit, deri para tetë muajsh ka qëndruar Hashim Rexhepi, i cili qe arrestuar dhe ndaj të cilit vazhdojnë hetimet.

Kryetarja e Komisionit për Buxhet dhe Financa Safete Hadergjonaj paraprakisht ka prezantuar dhe ka dhënë arsyetime për Safet Merovcin dhe Gani Gërgurin, dy kandidatët në garë. Në votim, Merovci nuk mori votat të mjaftueshme për postin e Guvernatorit.

Në një letër drejtuar deputetëve, shefi i Zyrës Civile Ndërkombëtare, Pieter Faith u ka sugjeruar atyre emrin e Gani Gërgurit për postin e guvernatorit, duke e vlerësuar atë si personin e vetëm që plotëson kushtet për këtë post.