Futbollistja nga Kosova Modesta Uka fiton kupën e Austrisë për gra

Futbollistja e kombëtares së Kosovës, Modesta Uka dha kontribut të veçantë në këtë ndeshje, duke u shpall edhe lojtare e ndeshjes

Skuadra e Modesta Ukës, ka fituar kupën e Austrisë për gra. Në finalen e 50-të ekipi vjenez “Austria Wien” triumfoi me meritë ndaj Red-Bull Salzburg, me rezultat 1-0 të enjten pasdite. Goli i fitores u shënua nga Katharina Schiechtl me një gjuajtje me kokë pas një gjuajtje nga këndi.  Ky titull është i pari në historinë e  ekipit të “Austria Wien” për gra.

Ndeshje u përcoll me një numër rekord shikuesish, mbi 4,600 njerëz ishin mbledhur në stadiumin “Sport Club” në Vjenë.

Pavarësisht që nuk shënoi gol, futbollistja e kombëtares së Kosovës, Modesta Uka dha kontribut të veçantë në këtë ndeshje, duke u shpall edhe lojtare e ndeshjes. Pas ndeshjes, Modesta shihet në njërën nga fotografitë duke formuar shqiponjën me duar, me çka ka dashtë të tregoi lidhjen e saj me prejardhjen nga vjen.

Modesta Uka është njëra nga futbollistet më të mira që ka Kosova dhe ajo me plot sukses po luan edhe në Austri.

E lindur në qytetin e Vitisë në Kosovë, Modesta nisi të luaj futboll në moshë të re, por gjatë qëndrimi 14 vjeçar në Kosovë nuk ishte aktivizuar në asnjë klub futbolli.

Në vitin 2014 Modesta vazhdoi jetën në Austri së bashku me familjen e saj.

Që nga ajo kohë ajo është aktivizuar me skuadrën austriake të futbollit “Sturm Graz” ku menjëherë u bë yll i ekipit. Vitin e kaluar, 27 vjeçarja shqiptare u transferua në ekipin e Vjenës “Austria Wien” me të cilët ka kontratë deri në vitin 2027.

Modesta dhe ekipi i saj përveç fitores së kupës së Austrisë, ato janë në garë edhe për titullin kampion të Austrisë.

---