Berisha dëshiron të luajë titullar

“Më pëlqen konkurrenca, sepse në këtë mënyrë mund të përmirësohesh. Nuk u mendova gjatë për të pranuar ofertën e Atalantës”, u shpreh Berisha

Portieri i Kombëtares shqiptare, Etrit Berisha dëshiron që të luajë nga fillimi dhe për këtë arsye është huazuar në Atalanta, shkruan albinfo.ch.

Ai nuk e filloi ndeshjen e fundit nga fillimi, megjithatë është i vendosur që të luftojë për një pozitë titullari. “E kisha të qartë se do të gjeja konkurrencë, por kjo ndodhte edhe te Lazio me Marchetti-n. Më pëlqen konkurrenca, sepse në këtë mënyrë mund të përmirësohesh. Nuk u mendova gjatë për të pranuar ofertën e Atalantës. Konko dhe Gjimshiti më folën mjaft mirë për klubin. Erdha këtu për të treguar vlerat e mia sa herë që të zbres në fushë. Te Lazio nuk isha i kënaqur nga qëndrimi në stol dhe erdha në Bergamo që të kem më tepër hapësira. Do të luaj shanset e mia dhe në fund do të jetë fusha ajo që vendos”, ka thënë portieri shqiptar.

27-vjeçari kuqezi do të luajë për një vit i huazuar te Atalanta, me bergamaskët që kanë mundësinë të ushtrojnë opsionin e blerjes. Gjithçka do të varet edhe nga fati i Sportiellos, me 24-vjeçarin që gjatë kësaj vere u kërkua nga Interi, Fiorentina dhe Napoli.