Më në fund Veseli zyrtarizohet te Empoli

Frederik Veseli bëhet lojtari i tretë i Kombëtares që transferohet nga Superliga zvicerane në Serinë A gjatë vitit 2016

01.11.2015; Lugano; Fussball Super League - FC Lugano - FC Sion; Elsad Zverotic (Sion) und Frederic Veseli (Lugano) (Claudia Minder/freshfocus)

Mbrojtësi shqiptar, Frederik Veseli është regjistruar me skuadrën e Empolit në Serie A, duke zgjidhur problemet burokratike që e mbanin të lidhur me Luganon edhe pse kishte gjetur gjuhën e përbashkët me klubin toskan, shkruan albinfo.ch.

Lajmin e bën të ditur Empoli në faqen zyrtare në internet ku thekson se Veseli është tashmë zyrtarisht një lojtar i kësaj skuadre, pasi ka nënshkruar një kontratë që skadon më 30 qershor 2018.

Marrëveshja mes 23-vjeçarit të Kombëtares shqiptare dhe klubit italian ishte arritur që në fillim të muajit gusht, por pengesat burokratike e penguan atë të bashkohej që në fazën përgatitore me skuadrën e tij të re.

Gjithsesi, mbrojtësi shqiptar do të jetë gati për javën e gjashtë të Serie A dhe është trajneri Giovanni Martusciello ai që do të vendosë nëse Veseli do të udhëtojë me skuadrën kundër Romës dhe Lazios.

Veseli bëhet lojtari i tretë i Kombëtares që transferohet nga Superliga zvicerane në Serinë A gjatë vitit 2016. Përpara tij, këtë rrugë e ndërmorën Arlind Ajeti, fillimisht te Frosinone dhe tashmë te Torino dhe Berat Gjimshiti te Atalanta edhe pse tashmë është huazuar te Avellino.

Gjithashtu, ai është lojtari i shtatë kuqezi që në sezonin e ri do të garojnë në elitën e futbollit italian, me koloninë shqiptare që përbëhet edhe nga Elseid Hysaj te Napoli, portierët Etrit Berisha te Atalanta dhe Thomas Strakosha te Lazio, si edhe Ledian Memushaj e Rey Manaj te Pescara.