Shtrenjtohet sigurimi shëndetësor për 4.5 për qind

Ndërsa më i madh është shtrenjtimi i premive për fëmijët. Ai mbërrin në 6.6 për qind

Premitë e sigurimit shëndetësor, vitin e ardhshëm, sa u përket personave të rritur do të shtrenjtohen mesatarisht për 4.5 për qind. Por, më i madh është shtrenjtimi i premive për fëmijët. Ai mbërrin në 6.6 për qind. Zyra Federale për Shëndetësi (BAG) e arsyeton këtë ngritje me faktin se viteve të fundit premitë e sigurimit shëndetësor të fëmijëve nuk kanë arritur të mbulojnë shpenzimet e bëra për trajtimin mjekësor të tyre, shkruan srf.ch.

Po ashtu edhe për të rinjtë do të ketë një rritje të theksuar të çmimit të premisë, gjegjësisht 5.4 për qind.

Ngritja e çmimit të sigurimit shëndetësor do të ndryshojë sipas kantoneve. Aktualisht, premitë më të shtrenjta i paguajnë qytetarët e kantonit-qytet Basel Stadt dhe të Gjenevës. Ndërsa më së liri kushton sigurimi shëndetësor për të rriturit në kantonet Appenzell Innerrhoden dhe Nidwalden.