Abrashi rikthehet nga lëndimi

Mesfushori kuqezi, Amir Abrashi pas lëndimit të rëndë është rikthyer në stërvitje dhe pritet të jetë i gatshëm për ndeshjen ndaj Izraelit më 12 nëntor

Mesfushori i Kombëtares shqiptare, Amir Abrashi rikthehet i gatshëm për të zbritur në fushë pas dëmtimit të pësuar në kokë gjatë seancës stërvitore me Freiburgun më 11 tetor, shkruan albinfo.ch.

Frika më e madhe ka kaluar për mesfushorin shqiptar, i cili është vënë në dispozicion të trajnerit Christian Streich, por rikthen qetësinë edhe në kampin e Kombëtares Shqiptare pasi ai do të jetë i gatshëm për sfidën e 12 nëntorit kundër Izraelit në “Loro Boriçi”.

Lajmin e bën të ditur gazeta “Kicker”, sipas së cilës, mesfushori e ka hedhur pas krahëve dëmtimin dhe është rikuperuar plotësisht.

“Ai është bashkuar me skuadrën në seancat stërvitore të ditës së martë dhe të mërkurë dhe është gati për të zbritur në fushë”, thekson “Kicker”.

Si pasojë e dëmtimit të pësuar në kokë, Abrashi nuk u aktivizua në ndeshjen e kësaj fundjave ku Freiburg pësoi humbje 2:1 nga Hoffenheim. Ai cilësohet si një nga lojtarët kyç të ekipit debutues në Bundesliga, pasi pa të në fushë skuadra has vështirësi të mëdha në organizimin e lojës.