Shaq, bëje sërish!

Pasi që me golin dhe lojën e jashtëzakonshme kishte siguruar fitoren kundër Danimarkës, pritjet e publikut për Shaqirin janë shumë të mëdha

„Shaqiri, e di më së miri“… se si ta gjejë rrugën deri te goli. Afërsisht kështu ka thënë kryetrajneri i kombëtares zvicerane U21 Pierluigi Tami, duke iu përgjigjur vërejtjeve të disave se “xhuxhi magjik” i futbollit zviceran, siç e quajnë mediet e këtushme Shaqirin, mbase është lodhur.

Ish futbollisti i njohur zviceran, sot analist i futbollit, Alain Sutter, ka shkuar më së largu me mosbesimin ndaj futbollistit shqiptar. “Shaqiri po ngarkon tepër shumë përgjegjësi mbi supet e tij. Ai nuk duhet që patjetër, në çdo aksion të bëjë diçka vendimtare për ndeshjen”, ka thënë Sutter.

Mirëpo të kundërtën e thonë trajneri i tij ashtu si dhe mediet. “Shaqiri nuk lodhet. Ai nuk do pauzë, por dëshiron të luajë vazhdimisht. Edhe në plazh po ia hodhe një top, ai do të luajë me të gjithë ditën, pa u lodhur”, ka thënë Tammi.

Ndërsa trajneri i kombëtares A, Othmar Hitzfeld, i cili e kishte shikuar ndeshjen kundër Danimarkës nga tribunat ka thënë për Shaq-in: “Xherdani  ishte njeriu superior në fushë”.

E gjithë kjo zhurmë rreth talentit të jashtëzakonshëm shqiptaro-zviceran, është ngritur pak ditë pas fitores së U21 kundër Danimarkës, dhe në kohën kur po pritet ndeshja e Zvicrës kundër Islandës (që luhet sot).

Pasi që me golin dhe lojën e jashtëzakonshme kishte siguruar fitoren kundër Danimarkës, pritjet e publikut për Shaqirin janë shumë të mëdha. Ai nuk  dëshiron të tradhtojë këto pritje. Po këtë e beson edhe publiku zviceran. Përveç Alain Sutter-it dhe ndonjë tjetri. Të cilit blick.ch i thotë: Mbylle Sutter!  Ndërsa Shaqirit i përgjërohet: “Bëje edhe një herë, Shaq” (Shaq, do it again), duke pasur ndërmend “reprizën” e Danimarkës.

Nëse fiton sot, Zvicra do të jetë shumë afër plasimit në gjysmëfinalen e Evropianit U21.