Ish-futbollisti i Barcelonës ëndërron të luajë për Shqipërinë

Ivan Balliu ka rrënjë shqiptare dhe ka thënë se ëndërron që një ditë të luajë për Kombëtaren shqiptare

Mbrojtësi i djathtë, Ivan Balliu kaloi në të gjitha ekipet e reja të Barcelonës. Ai në korrik të vitit 2015, u transferua në skuadrën franceze Metz. Ai në një intervistë për ‘transfermarkt.de’, ka treguar se ka rrënjë shqiptare, derisa ëndërron që të ftohet në Kombëtaren shqiptare, shkruan albinfo.ch.

Ai ka thënë se nuk di shumë për prejardhjen e tij. “Unë nuk di shumë lidhur me këtë. E di se paraardhësit e mi kanë shkuar nga Shqipëria për në Spanjë. Por, nuk kam më shumë informacion. Babai im është mundur të gjejë librin e familjes”, ka thënë ai.

Balliu ka thënë se po mendon edhe për Kombëtaren shqiptare. “Menaxheri im është në kontakt me Federatën Shqiptare të Futbollit. Unë mendoj se kam dëshmuar cilësitë e mia në karrierën time”, ka shtuar ai.

Ai flet edhe për ëndrrën e tij. “Për të luajtur në Kupën e Botës dhe për ta fituar (qesh). Jo, kjo është e vështirë. Unë ëndërroj të luajë me Kombëtaren shqiptare. Kam dëshmuar aftësitë e mia”, theksoi ish-futbollisti i Barcelonës.