Në pritje të debutimit

Arlind Ajeti shpreson që do të luajë ndaj Udineses, duke debutuar zyrtarisht me skuadrën e Torinos

Mbrojtësi i Kombëtares shqiptare, Arlind Ajeti shpreson që të debutojë sot ndaj Udineses, shkruan albinfo.ch.

23-vjecari i cili ka disa javë që e ka hedhur pas shpatullave dëmtimin që pësoi në fillim të sezonit, është stërvitur mirë dhe me përkushtim gjatë kësaj periudhe dhe ndoshta po vjen momenti i tij.

Nëse nuk gjen hapësira te Torino me siguri që Ajeti do të largohet në janar, pasi Pescara e pret krahëhapur, por ish-futbollisti i Baselit dëshiron të tregojë vlerat e tij dhe për momentin mendon vetëm për Torinon.

Në miqësoret e verës Ajeti ishte një pikë referimi në mbrojtjen e skuadrës së Mihajloviq, por më pas ai dëmtim muskulor që e mbajti jashtë fushave për disa javë u kthye në një problem për të.

Ajeti tashmë do të jetë gati edhe për Shqipërinë në sfidën e muajit nëntor ndaj Izrealit, por përpara se të japë kontributin e tij të vyer te kuqezinjtë, shtatlarti shqiptar dëshiron të luajë në Serinë A me Torinon duke filluar që nga ndeshja e radhës ndaj Udineses.